ចិន៖ ក្រុមអត្តពលិកប៉ារ៉ាឡាំពិកកម្ពុជា នឹងចាប់ផ្តើមការប្រកួត នៅក្នុងកម្មវិធីការប្រកួតកីឡាអាស៊ីប៉ារ៉ាហ្គេម ASIAN Para Games លើកទី៤ ព្រឹកថ្ងៃទី១៩ ខែតុលាឆ្នាំ២០២៣នេះ នៅទីក្រុងហាន់ចូវ ប្រទេសចិន។

លោក ហ៊ុន ម៉ានី បានបង្ហោះសារជូនពរ និង លើកទឹកចិត្តដល់ក្រុមអត្តពលិកប៉ារ៉ាឡាំពិកកម្ពុជា នាថ្ងៃព្រហស្បតិ៍ ទី១៩ ខែតុលា ឆ្នាំ២០២៣ នេះថា៖ «ក្នុងនាមខ្លួនខ្ញុំ និងសហការី នៃគណៈកម្មាធិការជាតិប៉ារ៉ាឡាំពិកកម្ពុជា សូមជូនពរដល់អត្តពលិកទាំងអស់ទទួលបានជោគជ័យលើបេសកកម្មតំណាងឱ្យព្រះរាជាណាចក្រកម្ពុជា»។

ជាមួយគ្នានេះ លោក ហ៊ុន ម៉ានី ក៏បានថ្លែងអរគុណចំពោះគ្រូបង្វឹក ក្រុមការងារ និងអត្តពលិកទាំងអស់សម្រាប់ការខិតខំប្រឹងប្រែងកន្លងមក ទាំងការសម្របសម្រួលការងារ ការបង្វឹកបង្រៀន ក៏ដូចជាការប្រឹងប្រែងហ្វឹកហាត់ក្នុងគោលដៅដើម្បីទទួលបានលទ្ធផលល្អ។

លោកបានគូសបញ្ជាក់ថា៖ «ទោះបីជាលទ្ធផលនៃការប្រកួតយ៉ាងណាក៏ដោយ សូមចងចាំថា អ្នកទាំងអស់គ្នាដែលជាអត្តពលិកទាំងអស់តែងតែមានប្រជាជនកម្ពុជា នៅជាមួយគ្នាគាំទ្រ បង្ហាញភាសាបេះដូងសម្រាប់កម្ពុជា និងលើកទឹកចិត្តគ្រប់ពេលវេលាក្នុងស្មារតីលើសពីការប្រកួត #BeyondTheGames»។

គួរឱ្យដឹងដែរថា កម្ពុជាបានបញ្ជូនប្រតិភូ និងអត្តពលិកកីឡាជនពិការកម្ពុជា ៦ប្រភេទកីឡា ដោយក្នុងនោះ កីឡាប្រភេទជាក្រុមមានចំនួន២ គឺក្រុមបាល់ទះអង្គុយ បុរស ៨នាក់ និងកីឡាបាល់បោះជិះរទេះនារី ១២នាក់ និង ប្រភេទកីឡា៤ ប្រភេទផ្សេងទៀត អត្តពលិកម្នាក់ៗ ចូលរួមក្នុងកម្មវិធីការប្រកួតកីឡាអាស៊ីប៉ារ៉ាហ្គេម ASIAN Para Games លើកទី៤ នៅទីក្រុងហាន់ចូវ ប្រទេសចិន៕